.jpg)
مالیكی دوا پۆستی له ده‌سته‌ی باڵای حه‌ج و عه‌مره‌ی عێراقی له‌كورد سه‌نده‌وه
.jpg)
به‌رێوه‌به‌ری راگه‌یاندنی وه‌زاره‌تی ئه‌وقاف و كاروباری ئاینی حكومه‌تی هه‌رێمی كوردستان رایگه‌یاند له‌سه‌ر داوای ده‌سته‌ی نه‌زاهه‌ی عیراق نوری مالیكی سه‌ره‌ك وه‌زیرانی عیراق دوا پۆستی له ده‌سته‌ی باڵای حه‌ج و عه‌مره‌ی عیراقی له‌كورد سه‌نده‌وه، ئه‌وه‌ش به‌پێی راگه‌یه‌نراوێكی راگه‌یاندنی وه‌زاره‌تی ئه‌وقاف. مه‌ریوان نه‌قشبه‌ندی رایگه‌یاند له‌سه‌ر داوای ده‌سته‌ی نه‌زاهه‌ی عیراق نوری مالیكی سه‌ره‌ك وه‌زیرانی عیراق (رائد ئه‌لبه‌لداوی)كه عه‌ره‌بێكی سه‌ر به‌حزبی فه‌زیله‌یه وه‌ك (پشكنه‌ری گشتی)ده‌سته‌ی باڵای حه‌ج و عه‌مره‌ی عیراق دامه‌زراند له‌كاتێكدا ئه‌و پۆسته به‌پله‌ی وه‌كیل وه‌زیره و تاكه پۆستی پۆستی كورده له‌ده‌سته‌ی ناوبراو و نزیكه‌ی 8ساڵ بوو ناصح عه‌قراوی به‌رێوه‌ی ده‌برد.
نه‌قشبه‌ندی وتیشی له‌سه‌ر راستی دانانی ئه‌م به‌پرسه نوێیه له‌پۆستێكی تایبه‌ت به‌كورد له‌به‌غدا په‌یوه‌ندی به‌رێكخه‌ری كاره‌كانی حكومه‌تی هه‌رێم له‌به‌غدا كردوه و ئه‌ویش بێ ئاگایی خۆی له‌م بڕیاره‌ی ماليكی ده‌ربڕیوه.
نه‌قشبه‌ندی هه‌روه‌ها نیگه‌رانی وه‌زاره‌تی ئه‌وقافی سه‌باره‌ت به‌م بڕیاره و هۆكاری پڕنه‌كردنه‌وه‌ی ئه‌م پۆسته له‌لایه‌ن حكومه‌تی هه‌رێم ده‌ربڕی و وتی "وه‌زاره‌تی ئه‌وقافی حكومه‌تی هه‌رێم چه‌ندین كه‌سایه‌تی شاره‌زای بۆ پڕكردنه‌وه‌ی ئه‌و پۆسته ده‌ستنیشان كردبوو به‌ڵام به‌هۆی خه‌مساردیه‌وه ئێستا دوا پۆستی ده‌سته‌ی باڵای حه‌ج و عومره‌ی عیراق له‌ده‌ست كورد ده‌رهێنرا و ئه‌وه‌ش كاریگه‌ریی سلبی له‌سه‌ر پرۆسه‌ی حه‌ج و عه‌مره‌ی هاوڵاتیانی هه‌رێمی كوردستان و كاریگه‌ریی كورد له‌م دۆسێیه‌دا ده‌بێت".